ភ្នំពេញ៖ សំបុត្រឥតគិតថ្លៃសម្រាប់ប្រជាពលរដ្ឋខ្មែររស់នៅក្រៅប្រទេស ចូលទស្សនាពិធីបើក និងពិធីបិទព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ បាននឹងកំពុងដំណើរការនៅស្តង់ផ្តល់ជូនសំបុត្រឥតគិតថ្លៃ ដែលមានទីតាំងនៅពហុកីឡដ្ឋានជាតិមរតកតេជោ។

យោងតាមការឱ្យដឹងពីក្រសួងទេសចរណ៍ សំបុត្រឥតគិតថ្លៃសម្រាប់ពលរដ្ឋខ្មែររស់នៅក្រៅប្រទេសនេះនឹងផ្តល់ជូន ចាប់ពីថ្ងៃទី២៤ ខែមេសា ឆ្នាំ២០២៣ រហូតដល់ថ្ងៃទី១ ខែឧសភា ឆ្នាំ២០២៣ ពេលព្រឹកចាប់ពីម៉ោង៨:៣០នាទី ដល់ ១១:៣០នាទីព្រឹក និងពេលរសៀល ចាប់ពីម៉ោង ២:៣០នាទី ដល់ ៥:៣០នាទីល្ងាច។

បច្ចុប្បន្នមានប្រជាពលរដ្ឋខ្មែរដែលរស់នៅ ធ្វើការ និងរៀនសូត្រ នៅសហរដ្ឋអាមេរិក កាណាដា អូស្ត្រាលី ចិន និងបណ្តាប្រទេសផ្សេងៗ បានចុះឈ្មោះ និងបានមកយកសំបុត្រ ដោយផ្ទាល់ ឬតាមរយៈបងប្អូន សាច់ញាតិ មិត្តភក្ដិដែលរស់នៅក្នុងប្រទេសកម្ពុជា។

ក្រសួងអំពាវនាវដល់ពលរដ្ឋខ្មែរដែលរស់នៅក្រៅប្រទេសចូលរួមទស្សនាពិធីបើក និងពិធីបិទនៃព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ ឱ្យបានច្រើនកុះករ ស្របតាមការអំពាវនាវ របស់ សម្តេចតេជោនាយករដ្ឋមន្ត្រី ឱ្យប្រជាពលរដ្ឋខ្មែរដែលរស់នៅក្រៅប្រទេសមកលេងស្រុកកំណើត ដើម្បីបានឃើញពីការអភិវឌ្ឍជាក់ស្ដែងនៅកម្ពុជា។

គួរឱ្យដឹងដែរថា សម្រាប់ប្រជាពលរដ្ឋខ្មែរដែលរស់នៅក្រៅប្រទេសអាចបន្តចុះឈ្មោះតាមប្រព័ន្ធអនឡាញ ឬ តាមរយៈគេហទំព័រ www.overseaskhmer2023.com ដើម្បីទទួលបានសំបុត្រ៕